Xarici İşlər Nazirliyi
Bakı, Azərbaycan

1992-ci ilin aprelində Rusiyanın Qorki şəhərindəki Xarici Dillər İnstitundan məzun olmaq üzrə idim. Sovet ittifaqı dağılmışdı və Azərbaycan müstəqil olmuşdu. Bu müstəqil ölkənin diplomatik xidmətinin bir hissəsi olmaq istəyirdim. Bakıya gəlib Xarici İşlər Nazirliyini axtarmağa başladım. Çoxsaylı səylərdən sonra məni işə ğötürdülər. Kiçik heyət olan Azərbaycanın ilk diplomatları ilə əlimdən nə gəlirdi edirdim - görüşlər qoyurdum, protokola və ictimai əlaqələrə kömək edirdim, Xarici İşlər Nazirini tərcümə edirdim. Nazirlə xaricə səfərlərə gedirdim, BMT, İslam Konfransı kimi təşkilatlarda nümayəndə heyətinin üzvü kimi iştirak edirdim. Xarici İşlər Nazirliyində cəmisi bir neçə ay işlədim. Dəmir Xanım Bakıya gələnə kimi.

Prezident Aparatı
Bakı, Azərbaycan                                                                                                                                           

1992-ci ilin sentyabr ayında Leydi Marqaret Tetçer Bakıya səfər etdi. Gülüstan sarayında onun çıxışını mən tərcümə etdim. Cəmisi bir neçə gün sonra məni Prezident Aparatında işləməyə dəvət etdilər. Prezident Aparatında İctimaiyyətlə Əlaqələr Şöbəsi yaradılırdı. Bu ofisi yaratmaq və burada işləmək üçün məni işə götürdülər. Prezidentin ictimai əlaqələrini idarə etməli idik, və bunu edə edə, kommunikasiya və ictimai əlaqələrin nə demək olduğunu öyrənirdik. Prezident Aparatında ingilis dilində danışan az idi. Onlardan biri də mən idim. Prezidentin dövlət başçıları və nümayəndə heyətləri ilə görüşlərini tərcümə edirdim. Ölkə qurulurdu, dövlət yaranırdı. Gənc bir insan üçün bunları ğörmək inanılmaz bir təcrübə idi və mən var gücümlə yorulmaq bilmədən çalışırdım. 

Azərbaycan Səfirliyi
Vaşinqton, ABŞ                                                                                                                                         

1993-cü ilin aprelində mən Azərbaycanın ilk diplomatlarından ibarət olan bir qrupla Vaşinqtona gəldim. Amerika Birləşmiş Ştatlarında Azərbaycanın ilk səfirliyini açmağa gəlmişdik. Diplomatik rankım İkinci Katib idi, əlimdən gələn hər işi görürdüm. Siyasi məsələlərə gələndə, Dövlət Departamenti, Pentaqon, Milli Təhlükəsizlik Şurasındakı həmkarlarla sıx işləyirdim. ABŞ Konqresi ilə geniş iş təcrübəm oldu və ABŞ hökumətinin bu qanunvericilik orqanının xüsusiyyətləri ilə yaxından tanış oldum. İqtisadi məsələlərlə bağlı İqtisadiyyat və Energetika Nazirlikləri ilə işlədim, iqtisadi münasibətlərin yaradılmasında, ticarət və sərmayələrin artırılmasında öz payımı verdim. 1996-cı ilin aprelində diplomatik xidməti başa vurub, həyatımın yeni səhifəsinə qədəm qoydum.

Hörmət etdiyim bir azərbaycanlı ABŞ-ın dünya şöhrətli universitetlərindən birində təhsil almaq üçün mənə təqaüd verdi. Emory Universitetinin Biznes İnstitutunda aldığım təhsil həyatımda hər şeyi dəyişdi. Mənə verilən təqaüdə "borc" kimi baxdım və onu qaytarmaq üçün Azərbaycana qayıtdım.

Azərbaycanda dünya səviyyəli bir universitet yaratmağa kömək etdim. Elə bir universitet ki, mənim kimi daha çox azərbaycanlılara imkan yaradacaq və illər keçdikcə ətrafında hər şeyi dəyişəcək. 

ADA Universiteti həyatımda ən böyük məna olub. Burda vəzifəmin adı və ya ofisimin ölçüsü məni maraqlandırmayıb. Arzu etmişəm və gəlib kömək etmişəm ki, təkcə binalar tikməyək, elə məkanlar yaradaq ki, dərs deməyin və öyrənməyin üslubunu yeniləsin; elə proqramlar təsis edək ki, təfəkkürü genişləndirsin; dərs deyən insanlar müəllim sözünün həqiqi mənasını ona qaytarsın; kitabxanada elm öyrənmək istəyi ünsiyyət yaratmaq həvəsi ilə birləşsin; texnologiya ənənəvi davranış normalarını kökündən yeniləsin; ruhun, mədəniyyətin, düşüncənin, vətəndaşlıq hissinin güclü olduğu yeni bir mühit yaradaq; dünyaya estetik baxış aşılayan, özünə inamı artıran, birinci dərəcəli vətəndaş olmaq əzmini gücləndirən bir həyat tərzi yaradaq. ADA-da keçirdiyim illər təhsilin gücünə olan inamım və bu dünyada nəsə yaratmağa kömək etmək əzmimin vəhdəti olub. 

ADA-ya 2006-cı ildə konsultant kimi gəldim. Elə həmin vaxtdan, əvvəlcə Azərbaycan Diplomatik Akademiyasının təsis olunmasının və sonradan onun ADA Universitetinə çevrilməsinin bir hissəsi olmuşam. ADA-nın strategiyasının hazırlanmasına kömək etmişəm, onun yüksək səviyyəli kampusunun dizaynı və tikintisinə nəzarət etmişəm, akademik proqramların təsis olunması, tələbə sayının artması, dünyanın müxtəlif ölkələrində olan universitetlərlə əmkdaşlığın genişlənməsi, büdcə və daimi maliyyə fondu üçün vəsaitlərin toplanması və idarə olunmasında iştirak etmişəm. Və bu kimi çoxsaylı fəaliyyətim olub. 

Mən gedəndə, ADA Universitetinin 5 institutu, 2500-dən çox tələbəsi, 120-yə yaxın müəllim və professoru, dünyanın 40-dan çox ölkəsindən tələbəsi, Bakının mərkəzində dillər əzbəri olan kampusu, və hətta Amerika Birləşmiş Ştatlarında binası vardı. ADA Azərbaycanın aparıcı universiteti və ali təhsildə müvəffəqiyyət nümunəsidir. Cəmi bir neçə il ərzində biz Azərbaycanda dünya səviyyəli universitet yaratmağa nail olduq. Bütün bu illər ərzində mən universitetin rəhbər vəzifələrində çalışdım. Əvvəlcə, Strategiya və İnkişaf üzrə Prorektor, və son illərdə, Birinci Prorektor vəzifəsində oldum.

Misilsiz bir məna ilə dolu olan 12 illik xidmətdən sonra, 2018-ci ildə mən ADA Universitetindən getdim. Yeni bir amacın arxasınca. Həyatımın növbəti səhifəsini iki övladıma həsr etmək istədim. Hər sabah həyatımı sevinc və gülüşlə dolduran oğluma və qızıma. 

2004-cü ildə Emory Biznes İnstitutunda MBA diplomumu aldım və öz şirkətimi yaratmaq qərarına gəldim. Elə həmin zamandan Vaşinqtonda yerləşən kiçik bir biznesi idarə edirəm.

MBA təhsilimin son semestrində İtaliyanın Milan şəhərinə köçdüm. Məqsədim Bocconi Universitetinin SDA Biznes İnstitutunda modanın idarə olunması proqramında oxumaq idi. Eyni zamanda, Giorgio Armani şirkətində staj keçirdim. Əvvəlcə, Atlantada yeni açılmış butikdə çalışmağa başladım. Oradan irəliləyib, Marketinq üzrə Vitse Prezidentlə işləmək üçün Nyu Yorkdakı baş ofisə keçdim. Giorgio Armani həmişə mənim üçün unudulmaz olaraq qalacaq. Bu şirkətdə mən istedadlı, yaradıcı, həyat ehtiraslı insanlarla işlədim və onlardan çox şey öyrəndim. 

Sonunda moda dünyasında davam etmək istəmədim. İtaliyada əldə etdiyim tanışlıq şəbəkəsindən istifadə edib, öz biznesimi yaratdım. Və müvəffəq bir biznes yaratdım. Üç il İtaliyada yaşadım. Bu ölkədən İtaliya, İspaniya, İsveçrə, ABŞ və Azərbaycan şirkətləri ilə işlədim. Bu şirkətlərin əksəriyyəti Azərbaycana sərmayə qoyub, yaxud da ki, burada satış bazarını təşkil edib. Bu sərmayə və ticarət əlaqələrinin konsept mərhələsindən dizayn, istehsal və satış səviyyəsinə kimi planlanıb təşkil olunmasında bizim şirkət mühüm rol oynayıb.

Yadda qalan ilk layihələrimizdən biri Azərbaycanda turizm strategiyasının işlənib hazırlanması idi. Bunu ABŞ Ticarət və İnkişaf Agentliyinin qrantı vasitəsilə həyata keçirdik. Bu gün Azərbaycan turizm mərkəzinə çevrilib, mühüm beynəlxalq tədbirlər Bakıda keçirilir.

ABŞ-da ticarət palatasını yaradıb idarə etməyim ondan əvvəl hökumət işində qazandığım təcrübəni daha da gücləndirdi. ABŞ-Azərbaycan Ticarət Palatasında beynəlxalq şirkətlərlə işləməyi öyrəndim. Sonra yüksək keyfiyyətli biznes təhsili aldım, İtaliya və Argentina kimi ölkələrdə yaşadım, və qərara aldım ki, kiçik sahibkarlıq mənim üçün daha düzgün seçimdir. Giorgio Armani sadəcə olaraq mənə bu kiçik sahibkarlığa daha yüksək pillədən başlamaq imkanı verdi.

Bütün bu illər ərzində, bir şirkət olaraq, strateji planlama, layihələrin idarə olunması, satış, yeni bazarların yaradılması və istehsalın təşkili kimi sahələrdə coxsaylı müştərilərə xidmət göstərmişik. Bir ideyanı konsept səviyyəsindən qaldırıb, çizib, tikib, quraşdırıb və idarə etmək sahəsində müvəffəqiyyətli layihələrimiz olub.

ABŞ-AZƏRBAYCAN TİCARƏT PALATASI  (USACC)             
Vaşinqton, D.C.      

1996-cı ilin mayında Birləşmiş Ştatlar və Azərbaycan arasında ticarət və sərmayələrin artmasına kömək etmək üçün Ticarət Palatası yaratdıq. Mən Palatanın ilk İcraçı Direktoru oldum. Gündəlik fəaliyyəti idarə edirdim, şirkətləri üzv olmağa cəlb edirdim, büdcə vəsaiti toplayırdım, ticarət missiyaları təşkil edirdim, sərmayələri təşviq etmək üçün konfranslar təşkil edirdim, ictimai əlaqələr yaradırdım. 

ABŞ-Azərbaycan Ticarət Palatasını cəmisi 5 min dollar ilk üzvlük haqqı ilə başladım, onu 70-dən çox şirkətin üzv olduğu və illik büdcəsi 1 milyon dolları aşan bir təşkilata çevirdim. Biz, Azərbaycan bazarına daxil olmaq və milyonlarla dollar həcmində müqavilələr imzalamağa nail olmaq üçün əlliyə yaxın şirkətə strateji məsləhətlər verdik.  

ABŞ-Azərbaycan Ticarət Palatası olaraq 1 milyon dollardan çox vəsait topladıq və Harvard Universitetində Xəzər Araşdırmaları Proqramını təsis etdik. Bu proqramın ən mühüm komponentlərindən biri Azərbaycan dövlət qulluqçularına Harvardın Kennedi İnstitutunda təhsil almaq üçün təqaüdün verilməsi idi. Məzun olub qayıdanların əksəriyyəti sonradan Azərbaycanın səfirləri və mühüm vəzifədə çalışan dövlət qulluqçuları oldular. 

ABŞ-Azərbaycan Ticarət Palatasında digər nailiyyətimiz Humanitar Missiyanı yaratmaq idi. Bu missiya vasitəsilə qaçqın və köçkün uşaqları arasında təhsilin önəmli olmasını vurğulamaq və fikir yaratmaq oldu. Relief İnternational təşkilatı ilə birlikdə qaçqın düşərgələrində 22 sinif otağı tikdik. 

2002-ci ildə ABŞ-Azərbaycan Ticarət Palatasını tərk etdim və Emory Universitetinin Goizueta Biznes İnstitutunda təhsil almaq üçün Atlanta şəhərinə köçdüm. 

AZƏRBAYCAN TİCARƏT VƏ MƏDƏNİYYƏT MƏRKƏZİ (ATCC)
Vaşınqton, D.C.

2000-ci ildə Azərbaycan Ticarət və Mədəniyyət Mərkəzi ideyasını gündəliyə qoydum və ABŞ-da ilk belə mərkəzi yaratdıq. Azərbaycan Sərgi Salonu və Ticarət Palatasının ofisinin yerləşdiyi və çoxşahəli fəaliyyətə malik olan bu mərkəz Vaşinqtonun nüfuzlu Corctaun rayonunda yerləşir.

Cəmisi 3 ay ərzində vəsait topladıq, dörd mərtəbəli tarixi bina aldıq və burada Azərbaycan Mərkəzi yaratdıq. Uzun illər boyu burada yerləşən Sərgi Salonunda Azərbaycanın məşhur xalçaları və rəsm əsərlərindən ibarət sərgilər təşkil etdik, ABŞ və Azərbaycan arasında mədəni əlaqələrin inkişafı üçün tədbirlər keçirtdik. Və mən bu Mərkəzi idarə etdim, sərgilər təşkil etdim, mədəniyyət və ticarət əlaqələrini genişləndirmək üçün ideyalar ortaya qoydum və onları həyata keçirdim.


ADA UNIVERSİTETİ FONDU
Vaşınqton, D.C.

ADA Universiteti Fondu 2007-ci ildə universitetin daimi maliyyə fondunu yaratmaq və ABŞ-dakı universitetlərlə münasibəti genişləndirmək məqsədi ilə təsis olunub. Yarandığı ildən mən Fondun Prezidenti vəzifəsini icra edirəm. Bu gün Fondun Vaşinqtonun mərkəzində dörd mərtəbəli binası var və o, ADA Universitetinin ABŞ-dakı fəaliyyətinin aparıcısıdır. Biz ADA Universitetinin kiçik də olsa daimi maliyyə fondunu idarə edirik, universitetin öz kadrları arasında təcrübə artırmaq səylərinə dəstək veririk, təhsil proqramlarını həyata keçiririk və mədəni əlaqələrin genişlənməsinə kömək edirik. 

2020-ci ildən etibarən Fond ADA-nın Beynəlxalq Kampusu kimi fəaliyyətə başlayacaq, burada universitetin tələbələri bir semestr ABŞ-da təhsil almaq imkanı əldə edəcək və universitetin professor-müəllim heyətinin sayını artırmaq üçün ABŞ universitetləri ilə layihələr həyata keçiriləcək. ADA Azərbaycanda daimi maliyyə fonduna malik olan yeganə universitetdir. ADA eyni zamanda Birləşmiş Ştatlarda kampusu olan xarici universitetlərdən biridir. 

Dupont Circle və Philipps Collection muzeyindən bir neçə addımlıqda yerləşən ADA Universiteti Fondu Vaşinqtonun Sərgi Salonları sırası kimi tanınan küçənin incisidir. Bu qonşuluqdan istifadə edib biz il boyu Azərbaycan rəsm və heykəltaraşlıq əsərlərinin sərgilərini keçiririk, ABŞ və Azərbaycan arasında mədəni əlaqələrin inkişafına da öz töhfəmizi verməyə çalışırıq.